මගේ පොත් සවාරිය සහ පශ්චාත් හන්දිපත් රුදාව


ඔන්න ඉතින් හැම අවුරුද්දකම වගේ විශාල ප්‍රීතියකින් මමත් ගියා පොත් ප්‍රදර්ශනේ බලන්න.හැබැයි තනියම..ටිකක් ගිහින් පුරුදු ඇත්තන්ට නම් මං කියන්නෙ තනියම යන එක තමා හොඳම වැඩේ.අත්වැල් අල්ලන් රංචු පිටින් ගියොත් වෙන්නේ පොත් ගන්නවට වඩා කට්ටිය ඉන්නවද කියල හොය හොය ඉන්න වෙන එකයි.

මං ප්‍රදර්ශනේට අඩුම තරමේ දවස් දෙකක් වත් යනවා.මොකද නෑදෑ යාළු හිත මිත්‍රාදීන් ගේන්න කියල දුන්නු එව්වා හොයන්න දවසක් ගියාම ම ට ඔන එව්ව ගන්න බැරි වෙන නිසා.යන්න ඔන්න මෙන්න තියලා නුවර පුන්චි අම්ම කතාකල්ල මහා ලිස්ට් එකක් කියෙව්වා.එයාට ඉතින් වැඩි පුරම බණ පොත් තමා ඔනා.බෞද්ධ ප්‍රකාශන එකෙන් සතිපට්ඨාන භාවනාවයි,අභිධර්ම පොතයි,හොයාගත්තා.හම් කවරයක් හෙම දාපු පිරුවාන පොත්වහන්සේ ගත්තත් හරි මාව පැත්තකට ඇල උණා.ඉතින් ඉතිරි දුරම ගියේ ඇල වෙලා තමයි..

ඔය අස්සේ දැක්ක අක්කලා නංගිලා නැන්දලා මාමලා මීමැහි පොදිය වගේ වටවෙලා ඉන්න තැනක්.50 % ඩිස්කවුන්ට් පොත් තොගයක්.බවලත් උදවිය ඇඳුම් තොරනවා වගේ මමත් ඉතින් ඔළුව එක තැනකිනුයි අත තව තැනකිනුයි රිංගවලා පොරේට බැස්සා.වැඩිපුර ඉතින් මල් කතා තමා තිබ්බේ.පහු බහින්නේ නැතිව පොර කාලා ගොර්කිගෙ පොතකුයි,හෙමිංවේගේ කෙටිකතා පොතකුයි,තව රුසියනු කතාවක කොටස් දෙකකුයි මතු කරගත්තා.හුස්ම හිර වෙන්න ගියාට පාඩු නෑ.

මං එද්දි අපෙ අක්කගේ පොඩි එකා කාටත් හොරෙන් මට කොලයක් දීලා ගියා.ඒක බලද්දි මට හිනා.පොල්ගෙඩි අකුරින් ශර්ලොක් හෝම්ස් පොත් 12කම නම් ලියලා.නේ පුතෝ...හැබයි අම්ම පුතා වෙනුවෙන් දීපු ලිස්ට් එකේ නම් එව්වා මුකු තිබ්බෙ නෑ.ඒත් ඉතින් පොඩි එකාගෙ හිත නරක් කරන්න බැරි නිසා මං එයින් 2 කුත් තෝර ගත්ත.

බැල්කනි එකේ ඉතින් වැඩිපුර තියෙන්නේ පොඩි පොඩි කුටිනේ.. ඒත් ආපු එකේ බලලාම යන්න ඕනා කියලා ගියාමය් හිතුනේ ආපු එක කොච්චර හොඳද කියලා.Bargain පොත් කඩ 2ක්..!!!!!! මට ඉතින් ඉහේ මල් පිපුණ ගානයි.
මං ඔය ඉංගිරිසි පොත් එහෙම වැඩිපුර ගන්නේ bargain කඩවලින් තමා.නියම ගානට තියන එව්වා ගන්න ගියොත් ඉතිං මුලු ප්‍රදර්ශනෙන්ම පොත් 3-4කට වඩා ගන්න වෙන්නෙ නැහැනේ..පොත් පෙරේතයින්ට පොත් වලට හොඳ ඉවක් තියනවාලුනේ.ඔය ඉවනිසාද මගේ වෙලාවාද මන්දා මට හම්බුනා නියම පොත් ටිකක්..
Paulo Coelho ගේ The Zahir (රු300 )
Aurthur Golden ගේ Memories of a Geisha (රු400 )
Michel Ondaatje ගේ Anils Ghost (රු300 )
1000යි ඔක්කොටම ගියේ.නියම ගාණට ගත්තානම් 4000 පනිනවා.(ඔන්න
මංවගේ කට්ටිය ඉන්නවානම් බැල්කනියේ කඩ 2 අමතක කරන්න එපා. )Da vinci code තිබ්බ 450 ට.හපොයි දුකේ බෑ.මං කලින් පාරක ගත්තේ 1200ට නේ...

ඊලඟට අමාරු උනේ අප්පච්චිගෙ පොත් ටික හොයා ගන්නයි.

Primary principles of labor law, ඇටිලාගේ නායකත්ව රහස්, Why I am not a christian, විපරම,පනාපුත්‍ර ගේ මතක වස්තුව(මේක නම් නියම පොතක් වගේ.ජැක්සන් ඇන්තනි මහත්මයා ලියලා තියෙන්නේ ).. , .......... , .............අපේ අප්පච්ච් බුක්ෆෙයා මුලින්ම පටන් ගත්තු එකේ ඉන්දන්ම ගියා.ඉස්සර අප්පච්චි පොත් ගේනකන්
මං මග බලා ඉන්නවා.ඒත් දැන් ඒකෙ අනිත් පැත්ත තමා වෙන්නෙ. දැන් එයැයිට සනීප මදි යන්න. බොහොම පිලිවෙලට පොත්වල නම,කතෘ,ප්‍රකාශකයා හෙම ලියලා සල්ලිත් එක්ක පොත් ලිස්ට් එක අතේ තියද්දි මට හරියට දුක හිතුණා ඉස්සර මතක් වෙලා..සෑහෙන අමාරුවෙන් උණත් 1ක් හැර අනිත් සේරොම හොයාගත්තා.

බණ්ඩාර්ණායක හෝල් එකෙන් පිට වෙද්දි 11ට කිට්ටුයි.වාඩිවෙන්නවත් ඉඩක් නැහැ එලියෙ.අන්තිමට සිරිමාවෝ එක ඉස්සරහා උත්සව හෙම තියන කෑල්ලේ පුටුවක් හොයා ගත්ත හති අරින්න.මෙන්න කව්දෝ මට හොඳ short-eats පිගානක් ඇල්ලුවා..අනේ පිංසිද්ද වෙච්චාවේ !!!.එතන මොකද්ද උත්සව සභාවක්..පුටු වල හිටි හැමෝටම සංග්‍රහ ලැබුණා.සුනිල් මාධව මහත්මයා කථාවකුත් පවත්වන්න පටන් ගත්තා.උදේ කෑමත් හරි...

ඔන්න ඔය හරියෙම තියනවා හරි අපූරු පුංචි කුටියක්.තනිකරම කවි පොත්.කවිකාරයින්ගේ එකමුතුවෙන් තමා කරන්නේ.අම්මා දෙපාරක්ම මතක් කරපු එරික් ඉලයප්ආරච්චිගෙ "මගෙ කොළඹට හඳ පායයි" (මෙවර සාහිත්‍ය සම්මාන ලද )පොත බොහොම පහසුවෙන් එතනින් හොයා ගත්තා.තව මංජුල වෙඩිවර්ධන
යන්ගේ "මේ ස්නේහයේ කල්වාරියයි" කියන පොතයි ආරියවංශ රණවීරයන්ගේ "මග දෙපස මල්" චීන කවි එකතුවයිත් ගත්තා.ඇත්තටම ඒවගේ එකම තැනකින් ගන්න ලැබුන එක හරි පහසුවක්.කවිකාරයින්ගේ එකමුතුවට තුති..!!!

අඩුගාණට කඩු පොත් ටිකකුත් ලැබුණා ඒ හරියෙන්ම.අපේ අප්පච්චිගෙන් මට ලකුණු වැඩිපුර වැටෙනවා ඉංගිරිස් පොතුත් ගෙනිච්චාම... :) කලින් පාර වගේම චිකන්සුප් පොත්2ක් හම්බුණා."Chicken soup for writers soul" , "
Chicken soup for the surviving soul "අගේ ඇති පොතක් වගේ.කියවනකන් ඉවසුමක් නෑ.අක්කණ්ඩිනම් මට හිනාවෙනවා හැමදාම..මෙයා අප්පච්චිට කියල චිකන්සුප් ගේන හේතුව අපි දන්නවා කියලා..

ඒ රවුම ගියාම හොඳ ගනන්.ඔන්න මං ආපහු අර උත්සව ශාලවට ඇවිත් වාඩි උණා.(සංග්‍රහ නම් නෑ ඒපාර )තව උත්සවයක් පටන් ගත්තා..ආරාධිත අමුත්තා...ආචාර්ය මර්වින් සිල්වා...!!!උන්නැහැ ඇවිදන් ආවත් හරි පිටිපස්සෙ ආසන වල බාගයක්ම දෙනා නැගිටල ගියා..වස ලැජ්ජාව...කැළණිය හරියෙදි මුන ගැහුනොත් අඩුගානෙ රවල යන්න
හරි මූණු පොඩිය බලාගන්න තව තප්පර කීපයක් ඉඳලා මාත් ආවා.හිම කිරමක් හෙම කාලා සිරිමවෝ හෝල් එකට කිට්ටු වෙනකොටම ආචාර්ය තුමාගේ දේසනාව ඇහෙන්න ගත්තා..මංගල ගැනත් හයියෙන් කියවුණා..අනේ සංසාරේ...කවි පොතක් දොරට වදින උත්සවේදිත්...

සරසවි කුටියේ පිරෙන්නම සෙනග.ඒත් නොගිහින් පුලුවනැයි..ඉතින් කකුල් පාගගෙන රැවුම් ගෙරවුම් අස්සෙ ඇතුලට රිංගා ගත්තා.අල්ලපුගෙදර ඇන්ටිට ගත්ත පබිලිස් මාමාගේ කෑම වට්ටෝරු පොත.අන්කල්ට ඇනා කැරනිනා සිංහල පරිවර්තනය.(එයාට අර තඩි පොතම ඔනාය කිව්වා )අපේ පොඩි එකාට හැරී පොටර් සිංහල පොත..(අනේ ඒකාට තාම ඉංගිරීසිය කියවාගන්න බෑ )අම්මට සිංහල ව්‍යාකරණ පොත්....... , ............ , ....

අනෙ අප්පේ සමහර බවලත් උදවිය පොත් ගන්නේ හරියට එළවළු ගන්නව වගේ නේ...කවරෙ දෙපැත්ත බැලුවා ..ගත්තා..එච්චරටම තමා ගන්න පොත ගැන කලින් දන්නවානම් ඔන්න කමක් නැ..ඒත් දන්නවද කියන එක තමා හිතාගන්න බැරි..කට්ටිය යහමින් පොත් ගන්නවා..ළමයින්ටත් ඉල්ලන පමාවෙන් අරන් දෙනවා..අනේ ඉතින් ඔය ගන්න පමණට ගෙනියන පමණට කියවනවානම් බොහොම අගෙයි..බොහෝ දෙනෙක් අතේ සුනේත්‍රා රජකරුණානයක මහත්මියගෙ පොදු පුරුෂයා තිබ්බා.(මෙවර හොඳම නව කථාව ) .ඇත්තටම නියම පොත.මං ඒක ගියපාර ගත්තනේ.සුනේත්‍රා මහත්මියගෙ අලුත් පොත් නෑකියලයි
මං හිතුවෙ..මෙන්න තියනවා "බුද්ධදාසී" සුදට සුදේ..උඩම රාක්කයක...පොත බොහොම බරයි.ගාණත් ඒවගේමයි.ඒත් මගේ ප්‍රියතම ලේඛ්කාවගෙ පොත නොගෙන කොහොමද...පොත් වලට සල්ලිගෙවන්න සෑහෙන වෙලාවක් ඉන්න උණා පෝලිමේ.ඉතිරි සල්ලි එක්ක කවුන්ටරේ අක්ක තව මොකද්දෝ දුන්නා.."ආකාස කුසුම්" බලන්න නොමිලේ ප්‍රවේශ පත්‍රයක්..!!!නියමයි නේ..දෙවැනිපාරටත් බලන්න ඕන..

තව පැයක් 2ක් ඇවිදලා අතින් කටින් එල්ලගෙන 154 කට ගොඩවෙද්දි 4ත් පහුවෙලා.උදේ ගෙදරින් ආවේ 7 ටනේ.තුම්මුල්ලේ බලා හිටියත් ආසන තියන බස් එකක් හම්බුනේ නෑ.ගල් පැටෙව්වා වගේ මලු උස්සගෙන ඉන්න හැටි දැකලා දුක හිතිලාද කොහෙද කරුණාවන්ත නංගි කෙනෙක් බෑග්1ක් ඉල්ලගත්තා.අනිත් මල්ල කරේ.ඒ බර උස්සගෙන පැය 2ක් බස් එකේ හිටන් ඇවිත් ගෙවල් ගාවින් බහිද්දි නිකන් උරහිසක් නෑ වගේ..හැබැයි හිත නම් ඉස්මුත්තෙටම පිරිලා.

හරස් පාරෙ මගක් එනකොටම පොඩි එකා දුවලා ඇවිත්ත් මල්ලක් ඉල්ල ගත්තා.ඌ හවස් වරුවෙම බලා ඉඳලා මන් එනකන්.අල්ලපු ගෙදර පොත් ටික ගේට්ටුව ගාවදිම දුන්නා..වයසක දෙපලට හරි සතුටුයි.මන් ඇන්ටිට පැච්වර්ක් පොතකුත් ගත්තනේ නිකමට වගේ.. :)) අනේ එයා වැඩිපුරම සතුටු උණෙ ඒකට..

ගෙදරට එද්දි අම්මා, අප්පච්චි ,අක්කා ,මස්සිනා හැමෝම දොරකඩ.මට මහා ආඩම්බරයක් දැනුණා.
මං හම්බුකළ සතයක් වත් නෑ තමා..ඒත් හැමෝම මං පොත් අරන් එනකන් මග බලන් උන්නු හැටි දැක්කම මගෙ හිත ආදරෙන් පිරිලා ගියා..මස්සිනා අයියට මල් එයාට ගෙනා ස්පෝර්ට්ස් සඟරා ටික දුන්නම.ශර්ලොක් හෝම්ස් දැකලා කොල්ලාගේ ඇස් දිලිසුණා..ඌ හිතන්නෙ නැතුව ඇති මං ගෙනෙයි කියලා..(ගෙනාවෙ නැත්නම් පොඩි එකාට කොච්චර දුක හිතෙය්ද.. )
අප්පච්චිටත් හරිම සන්තෝසයි එයාගෙ ගොඩ දැකලා..අනේ ඉස්සර මාත් එහෙමනේ අප්පච්චි පොත් ගෙනාවම..සිලිකවර අයින් කරලා පුත්‍රයා සේරොම පොත් ටික සාලේ මේසේ මැද ගොඩ ගැහුවා..මටම පුදුමයි එච්චර උස්සන් ආවද කියලා..දැන් උරපත්තනම් හොදටම රිදෙනවා..අම්මට කියලා තෙල් වත් ගාව ගන්න ඕන.ඇයි ආයි දවසක් යන්න එපැයි මගෙ ගොඩ ගේන්න...

කොච්චර අමාරුකන් උණත් අලුත් පොත් ව්ල සුවඳින් මුලු හිතම පිරිලා.මං හම්බකල්ලා ගෙනාවා වගේ සතුටුයි..පොත් කියන්නෙ ඉතින් මට නම් ජීවිතේ වගේ තමා...








මගේ පොත් සවාරිය සහ පශ්චාත් හන්දිපත් රුදාව

ඔන්න ඉතින් හැම අවුරුද්දකම වගේ විශාල ප්‍රීතියකින් මමත් ගියා පොත් ප්‍රදර්ශනේ බලන්න.හැබැයි තනියම..ටිකක් ගිහින් පුරුදු ඇත්තන්ට නම් මං කියන්නෙ තනියම යන එක තමා හොඳම වැඩේ.අත්වැල් අල්ලන් රංචු පිටින් ගියොත් වෙන්නේ පොත් ගන්නවට වඩා කට්ටිය ඉන්නවද කියල හොය හොය ඉන්න වෙන එකයි.

මං ප්‍රදර්ශනේට අඩුම තරමේ දවස් දෙකක් වත් යනවා.මොකද නෑදෑ යාළු හිත මිත්‍රාදීන් ගේන්න කියල දුන්නු එව්වා හොයන්න දවසක් ගියාම ම ට ඔන එව්ව ගන්න බැරි වෙන නිසා.යන්න ඔන්න මෙන්න තියලා නුවර පුන්චි අම්ම කතාකල්ල මහා ලිස්ට් එකක් කියෙව්වා.එයාට ඉතින් වැඩි පුරම බණ පොත් තමා ඔනා.බෞද්ධ ප්‍රකාශන එකෙන් සතිපට්ඨාන භාවනාවයි,අභිධර්ම පොතයි,හොයාගත්තා.හම් කවරයක් හෙම දාපු පිරුවාන පොත්වහන්සේ ගත්තත් හරි මාව පැත්තකට ඇල උණා.ඉතින් ඉතිරි දුරම ගියේ ඇල වෙලා තමයි..

ඔය අස්සේ දැක්ක අක්කලා නංගිලා නැන්දලා මාමලා මීමැහි පොදිය වගේ වටවෙලා ඉන්න තැනක්.50 % ඩිස්කවුන්ට් පොත් තොගයක්.බවලත් උදවිය ඇඳුම් තොරනවා වගේ මමත් ඉතින් ඔළුව එක තැනකිනුයි අත තව තැනකිනුයි රිංගවලා පොරේට බැස්සා.වැඩිපුර ඉතින් මල් කතා තමා තිබ්බේ.පහු බහින්නේ නැතිව පොර කාලා ගොර්කිගෙ පොතකුයි,හෙමිංවේගේ කෙටිකතා පොතකුයි,තව රුසියනු කතාවක කොටස් දෙකකුයි මතු කරගත්තා.හුස්ම හිර වෙන්න ගියාට පාඩු නෑ.

මං එද්දි අපෙ අක්කගේ පොඩි එකා කාටත් හොරෙන් මට කොලයක් දීලා ගියා.ඒක බලද්දි මට හිනා.පොල්ගෙඩි අකුරින් ශර්ලොක් හෝම්ස් පොත් 12කම නම් ලියලා.නේ පුතෝ...හැබයි අම්ම පුතා වෙනුවෙන් දීපු ලිස්ට් එකේ නම් එව්වා මුකු තිබ්බෙ නෑ.ඒත් ඉතින් පොඩි එකාගෙ හිත නරක් කරන්න බැරි නිසා මං එයින් 2 කුත් තෝර ගත්ත.

බැල්කනි එකේ ඉතින් වැඩිපුර තියෙන්නේ පොඩි පොඩි කුටිනේ.. ඒත් ආපු එකේ බලලාම යන්න ඕනා කියලා ගියාමය් හිතුනේ ආපු එක කොච්චර හොඳද කියලා.Bargain පොත් කඩ 2ක්..!!!!!! මට ඉතින් ඉහේ මල් පිපුණ ගානයි.
මං ඔය ඉංගිරිසි පොත් එහෙම වැඩිපුර ගන්නේ bargain කඩවලින් තමා.නියම ගානට තියන එව්වා ගන්න ගියොත් ඉතිං මුලු ප්‍රදර්ශනෙන්ම පොත් 3-4කට වඩා ගන්න වෙන්නෙ නැහැනේ..පොත් පෙරේතයින්ට පොත් වලට හොඳ ඉවක් තියනවාලුනේ.ඔය ඉවනිසාද මගේ වෙලාවාද මන්දා මට හම්බුනා නියම පොත් ටිකක්..
Paulo Coelho ගේ The Zahir (රු300 )
Aurthur Golden ගේ Memories of a Geisha (රු400 )
Michel Ondaatje ගේ Anils Ghost (රු300 )
1000යි ඔක්කොටම ගියේ.නියම ගාණට ගත්තානම් 4000 පනිනවා.(ඔන්න
මංවගේ කට්ටිය ඉන්නවානම් බැල්කනියේ කඩ 2 අමතක කරන්න එපා. )Da vinci code තිබ්බ 450 ට.හපොයි දුකේ බෑ.මං කලින් පාරක ගත්තේ 1200ට නේ...

ඊලඟට අමාරු උනේ අප්පච්චිගෙ පොත් ටික හොයා ගන්නයි.

Primary principles of labor law, ඇටිලාගේ නායකත්ව රහස්, Why I am not a christian, විපරම,පනාපුත්‍ර ගේ මතක වස්තුව(මේක නම් නියම පොතක් වගේ.ජැක්සන් ඇන්තනි මහත්මයා ලියලා තියෙන්නේ ).. , .......... , .............අපේ අප්පච්ච් බුක්ෆෙයා මුලින්ම පටන් ගත්තු එකේ ඉන්දන්ම ගියා.ඉස්සර අප්පච්චි පොත් ගේනකන්
මං මග බලා ඉන්නවා.ඒත් දැන් ඒකෙ අනිත් පැත්ත තමා වෙන්නෙ. දැන් එයැයිට සනීප මදි යන්න. බොහොම පිලිවෙලට පොත්වල නම,කතෘ,ප්‍රකාශකයා හෙම ලියලා සල්ලිත් එක්ක පොත් ලිස්ට් එක අතේ තියද්දි මට හරියට දුක හිතුණා ඉස්සර මතක් වෙලා..සෑහෙන අමාරුවෙන් උණත් 1ක් හැර අනිත් සේරොම හොයාගත්තා.

බණ්ඩාර්ණායක හෝල් එකෙන් පිට වෙද්දි 11ට කිට්ටුයි.වාඩිවෙන්නවත් ඉඩක් නැහැ එලියෙ.අන්තිමට සිරිමාවෝ එක ඉස්සරහා උත්සව හෙම තියන කෑල්ලේ පුටුවක් හොයා ගත්ත හති අරින්න.මෙන්න කව්දෝ මට හොඳ short-eats පිගානක් ඇල්ලුවා..අනේ පිංසිද්ද වෙච්චාවේ !!!.එතන මොකද්ද උත්සව සභාවක්..පුටු වල හිටි හැමෝටම සංග්‍රහ ලැබුණා.සුනිල් මාධව මහත්මයා කථාවකුත් පවත්වන්න පටන් ගත්තා.උදේ කෑමත් හරි...

ඔන්න ඔය හරියෙම තියනවා හරි අපූරු පුංචි කුටියක්.තනිකරම කවි පොත්.කවිකාරයින්ගේ එකමුතුවෙන් තමා කරන්නේ.අම්මා දෙපාරක්ම මතක් කරපු එරික් ඉලයප්ආරච්චිගෙ "මගෙ කොළඹට හඳ පායයි" (මෙවර සාහිත්‍ය සම්මාන ලද )පොත බොහොම පහසුවෙන් එතනින් හොයා ගත්තා.තව මංජුල වෙඩිවර්ධන
යන්ගේ "මේ ස්නේහයේ කල්වාරියයි" කියන පොතයි ආරියවංශ රණවීරයන්ගේ "මග දෙපස මල්" චීන කවි එකතුවයිත් ගත්තා.ඇත්තටම ඒවගේ එකම තැනකින් ගන්න ලැබුන එක හරි පහසුවක්.කවිකාරයින්ගේ එකමුතුවට තුති..!!!

අඩුගාණට කඩු පොත් ටිකකුත් ලැබුණා ඒ හරියෙන්ම.අපේ අප්පච්චිගෙන් මට ලකුණු වැඩිපුර වැටෙනවා ඉංගිරිස් පොතුත් ගෙනිච්චාම... :) කලින් පාර වගේම චිකන්සුප් පොත්2ක් හම්බුණා."Chicken soup for writers soul" , "
Chicken soup for the surviving soul "අගේ ඇති පොතක් වගේ.කියවනකන් ඉවසුමක් නෑ.අක්කණ්ඩිනම් මට හිනාවෙනවා හැමදාම..මෙයා අප්පච්චිට කියල චිකන්සුප් ගේන හේතුව අපි දන්නවා කියලා..

ඒ රවුම ගියාම හොඳ ගනන්.ඔන්න මං ආපහු අර උත්සව ශාලවට ඇවිත් වාඩි උණා.(සංග්‍රහ නම් නෑ ඒපාර )තව උත්සවයක් පටන් ගත්තා..ආරාධිත අමුත්තා...ආචාර්ය මර්වින් සිල්වා...!!!උන්නැහැ ඇවිදන් ආවත් හරි පිටිපස්සෙ ආසන වල බාගයක්ම දෙනා නැගිටල ගියා..වස ලැජ්ජාව...කැළණිය හරියෙදි මුන ගැහුනොත් අඩුගානෙ රවල යන්න
හරි මූණු පොඩිය බලාගන්න තව තප්පර කීපයක් ඉඳලා මාත් ආවා.හිම කිරමක් හෙම කාලා සිරිමවෝ හෝල් එකට කිට්ටු වෙනකොටම ආචාර්ය තුමාගේ දේසනාව ඇහෙන්න ගත්තා..මංගල ගැනත් හයියෙන් කියවුණා..අනේ සංසාරේ...කවි පොතක් දොරට වදින උත්සවේදිත්...

සරසවි කුටියේ පිරෙන්නම සෙනග.ඒත් නොගිහින් පුලුවනැයි..ඉතින් කකුල් පාගගෙන රැවුම් ගෙරවුම් අස්සෙ ඇතුලට රිංගා ගත්තා.අල්ලපුගෙදර ඇන්ටිට ගත්ත පබිලිස් මාමාගේ කෑම වට්ටෝරු පොත.අන්කල්ට ඇනා කැරනිනා සිංහල පරිවර්තනය.(එයාට අර තඩි පොතම ඔනාය කිව්වා )අපේ පොඩි එකාට හැරී පොටර් සිංහල පොත..(අනේ ඒකාට තාම ඉංගිරීසිය කියවාගන්න බෑ )අම්මට සිංහල ව්‍යාකරණ පොත්....... , ............ , ....

අනෙ අප්පේ සමහර බවලත් උදවිය පොත් ගන්නේ හරියට එළවළු ගන්නව වගේ නේ...කවරෙ දෙපැත්ත බැලුවා ..ගත්තා..එච්චරටම තමා ගන්න පොත ගැන කලින් දන්නවානම් ඔන්න කමක් නැ..ඒත් දන්නවද කියන එක තමා හිතාගන්න බැරි..කට්ටිය යහමින් පොත් ගන්නවා..ළමයින්ටත් ඉල්ලන පමාවෙන් අරන් දෙනවා..අනේ ඉතින් ඔය ගන්න පමණට ගෙනියන පමණට කියවනවානම් බොහොම අගෙයි..බොහෝ දෙනෙක් අතේ සුනේත්‍රා රජකරුණානයක මහත්මියගෙ පොදු පුරුෂයා තිබ්බා.(මෙවර හොඳම නව කථාව ) .ඇත්තටම නියම පොත.මං ඒක ගියපාර ගත්තනේ.සුනේත්‍රා මහත්මියගෙ අලුත් පොත් නෑකියලයි
මං හිතුවෙ..මෙන්න තියනවා "බුද්ධදාසී" සුදට සුදේ..උඩම රාක්කයක...පොත බොහොම බරයි.ගාණත් ඒවගේමයි.ඒත් මගේ ප්‍රියතම ලේඛ්කාවගෙ පොත නොගෙන කොහොමද...පොත් වලට සල්ලිගෙවන්න සෑහෙන වෙලාවක් ඉන්න උණා පෝලිමේ.ඉතිරි සල්ලි එක්ක කවුන්ටරේ අක්ක තව මොකද්දෝ දුන්නා.."ආකාස කුසුම්" බලන්න නොමිලේ ප්‍රවේශ පත්‍රයක්..!!!නියමයි නේ..දෙවැනිපාරටත් බලන්න ඕන..

තව පැයක් 2ක් ඇවිදලා අතින් කටින් එල්ලගෙන 154 කට ගොඩවෙද්දි 4ත් පහුවෙලා.උදේ ගෙදරින් ආවේ 7 ටනේ.තුම්මුල්ලේ බලා හිටියත් ආසන තියන බස් එකක් හම්බුනේ නෑ.ගල් පැටෙව්වා වගේ මලු උස්සගෙන ඉන්න හැටි දැකලා දුක හිතිලාද කොහෙද කරුණාවන්ත නංගි කෙනෙක් බෑග්1ක් ඉල්ලගත්තා.අනිත් මල්ල කරේ.ඒ බර උස්සගෙන පැය 2ක් බස් එකේ හිටන් ඇවිත් ගෙවල් ගාවින් බහිද්දි නිකන් උරහිසක් නෑ වගේ..හැබැයි හිත නම් ඉස්මුත්තෙටම පිරිලා.

හරස් පාරෙ මගක් එනකොටම පොඩි එකා දුවලා ඇවිත්ත් මල්ලක් ඉල්ල ගත්තා.ඌ හවස් වරුවෙම බලා ඉඳලා මන් එනකන්.අල්ලපු ගෙදර පොත් ටික ගේට්ටුව ගාවදිම දුන්නා..වයසක දෙපලට හරි සතුටුයි.මන් ඇන්ටිට පැච්වර්ක් පොතකුත් ගත්තනේ නිකමට වගේ.. :)) අනේ එයා වැඩිපුරම සතුටු උණෙ ඒකට..

ගෙදරට එද්දි අම්මා, අප්පච්චි ,අක්කා ,මස්සිනා හැමෝම දොරකඩ.මට මහා ආඩම්බරයක් දැනුණා.
මං හම්බුකළ සතයක් වත් නෑ තමා..ඒත් හැමෝම මං පොත් අරන් එනකන් මග බලන් උන්නු හැටි දැක්කම මගෙ හිත ආදරෙන් පිරිලා ගියා..මස්සිනා අයියට මල් එයාට ගෙනා ස්පෝර්ට්ස් සඟරා ටික දුන්නම.ශර්ලොක් හෝම්ස් දැකලා කොල්ලාගේ ඇස් දිලිසුණා..ඌ හිතන්නෙ නැතුව ඇති මං ගෙනෙයි කියලා..(ගෙනාවෙ නැත්නම් පොඩි එකාට කොච්චර දුක හිතෙය්ද.. )
අප්පච්චිටත් හරිම සන්තෝසයි එයාගෙ ගොඩ දැකලා..අනේ ඉස්සර මාත් එහෙමනේ අප්පච්චි පොත් ගෙනාවම..සිලිකවර අයින් කරලා පුත්‍රයා සේරොම පොත් ටික සාලේ මේසේ මැද ගොඩ ගැහුවා..මටම පුදුමයි එච්චර උස්සන් ආවද කියලා..දැන් උරපත්තනම් හොදටම රිදෙනවා..අම්මට කියලා තෙල් වත් ගාව ගන්න ඕන.ඇයි ආයි දවසක් යන්න එපැයි මගෙ ගොඩ ගේන්න...

කොච්චර අමාරුකන් උණත් අලුත් පොත් ව්ල සුවඳින් මුලු හිතම පිරිලා.මං හම්බකල්ලා ගෙනාවා වගේ සතුටුයි..පොත් කියන්නෙ ඉතින් මට නම් ජීවිතේ වගේ තමා...

අක්කා සහ කඳුළු තේ...

අක්කා විවාහ වී අයියාගේ නිවසේ පදිංචියට ගියත් මට හැම විටම දැනෙන්නේ ඇය ඉන්නවා කියලමයි.ඇගේ ආදරය එතරම් ඝණකමට ගෙදර හැම අහුමුල්ලකටම රිංගලා..පැතිරිලා..අම්මානම් තවම වැඩි කථාබහක් නැහැ.ඇගේ දෑස් දීප්තිමත් වෙන්නේ දුරකථනය නාදවෙනකොට තමා..

මංගල්‍යයදා සියලු නෑදෑ හිතමිතුරන්ගෙන් සමුගන්න වෙලේ එකදු කඳුලක් නොහෙලූ අක්කා අම්මාව බදාගෙන නොසෙල්වී සිටි මොහොතේ, අක්කාගේ හැර පැමිණ උන් සියල්ලන්ගේම දෑස් තෙත් වෙන්න ඇති.නමුත් ඇගේ කඳුළු දැක්කේ මම විතරයි..ඒ මගුල් දාට කලින් දිනයේ නොසිතූ වෙලාවකයි.අක්කා සිහිවන හැම වෙලාවකදීම එදා ඇගේ මුහුනේ තිබූ හැඟීම් රේඛා සියල්ල සමග ඇගේ රුව මැවෙනවා..එතකොට දෑස් බොඳ වෙලා ඉවරයි මටත් නොදැනීම..

මංගල්‍යයට කලින්දවසේ ගෙදර හරිම ප්‍රීතිමත්..එදාදවල් අපි පන්සලට දානයක් දුන්නා.ඒ වැඩ නිමකල්ලා කෑම බීම,වළං පිඟන් ආදිය අස්කරලා හැමෝම පුටු උඩ, පුටුඇඳි උඩ, ජනෙල් පඩිඋඩ එහෙම වාඩිවෙලා විහිළුතහළු කරමින් හිටියා.පවුලේ නෑදෑ ළමා ලපටි හැමෝම එකතුවෙන්නේ බොහොම කලාතුරකින්නේ.ඒත් අක්කාට නම් නිවණක් තිබුණේ නැහැ.ඇය ඒ මොහොතෙත් දුරකථනයට කොටු වෙලා කාටදෝ උපදෙස් දුන්නා.වැඩේ ඉවරයක් කරලම අක්කා ඇඳි පුටුවේ හරිබරි ගැහුනේ ලොකුඅක්කගේ පොඩි එකාවත් ඔඩොක්කුවේ වාඩිකරන්.ඔන්න ඉතින් සතුටු සාමීචිය පැය භාගයක් විතර යද්දී අපේ අප්පච්ච්ට තේ තිබහක් ආවා.ආච්චිඅම්මාටත් කියවුණා කහට උගුරක් තිබ්බානම් හොඳයි කියලා.

අපේ ගෙදර තේ කෝස් එක හැමදාම කරන්නේ අක්කා තමයි.ලොකු අක්කාගේ තේ වලට ඡන්ද ඉතාම අඩු නිසා හැමෝම අක්ක දිහා බැලුවා."..මැණිකේ..ඉතින් අද විතරයිනේ.." කියලා දයා පුංචි ආදරෙන් කිව්වාට පස්සෙයි අක්කා මූණ නරක් කරන් උනත් නැගිට්ටේ.

පොඩි එකා පිස්සු දඟවැඩ කරලා අපි හමෝවම හිනස්සන අතරේ තේ වෙනදාටවඩා පරක්කු බව අම්මට මතක් උණා.ආච්චම්මා සනීපෙට ඔළුව අතගාන අතරේ නිදිකිරාවැටෙමින් උන් මම "අක්කේ....මොකද පරක්කූ.." කියා අහගෙන කුස්සියට ගියේ නිදිමතේමයි.කෑම කාමරේ තිර නොදැමූ ජනේලය හරහ පෙනුණ දසුන මාව හිටි අඩියේම නතරකලේ පපුවේ ගඹුරුම තැනක යමක් හිරකරමින්.

මගේ අක්කා..මගේ ආදරණීය අක්කා..කුස්සියේ තේ හදන තැන බිම ගුලිවී වාඩිවෙලා දෑතින් පපුවට යමක් තදින් හිරකරගෙන සිටියා..සැම විටම සිනාරැලි වලින් වසාගෙන සිටි ඇගේ දුක පුපුරාගොස් දෝරේ ගලායමින් තිබුණා....හැඬුම් නවතා ගන්න දැඩි අරගලයක නිරත උණත්, සුමුදු තලෙළු කම්මුල් පෙඟීයන්න තරමට ගැලූ කඳුළු නවතාගන්නට ඇයට හැකිඋණේ නැහැ...ඇයගේ මුහුණේ එතරම් වේදණාවක් සටහන් වී තිබෙණවා මම මීට පෙර දැකලා තිබ්බේ නැහැ...අක්කාගේ කඳුළු ඒතරම් බරට කවදාවත් වැටිලා නැහැ......

ආයාසයෙන් දෑස් හැර නැගීසිටි අක්කා එතෙක් පපුවට සිරකරගෙන සිටි - අප්පච්චී තේ බොන, අණ්ඩේ පලුද්දක් ඇති පැණිපාට කෝප්පයට සීරුවෙන් තේ වත්කළා.එක හුස්මක් වත් නොහෙලා පාෂාණිභූතවී බලාසිටි මගේ දෑස් වැගිරෙන්න ගත්තේ,මීට වසර කිහිපයකට පෙර මහපොළ සැණකෙළියකින් අක්කාම මට ගෙනත්දුන් මිකීමවුස් රූපඇඳි තේ ජෝගුව ඇය කඳුළු වැකි කම්මුලට තදකරගත් මොහොතේයි.එතැන තවත් රැඳී ඉන්න මට ශක්තියක් තිබ්බේ නහැ.නානකාමරයට දුවන් ගොස් දොරවසාගෙන,ජලකරාමයේ හඬට මුවාවෙලා මම හොදටම ඇඩුවා.....දොරේ වනා තිබූ අක්කාගේ කහපැහැ සුවඳැති සාලුව මිරිකාගෙන මම ඇඩුවා.....

"කෝ මේ තේ හදන්න ගිය අයත් නෑ..බලන්න ගිය අයත් නෑ..විජෙ රජ්ජුරවන්ට උණා වගේද.."ඒ අප්පච්චියි.එතකොටම අක්කා දොරට ගහන්න ගත්තා ඇයට නාන්න ඕනායයි කියමින්.ඇයත් මමත් අහක බලගෙනම එකිනෙකා පසුකරන් ගියා.විවිධාකරයට හදපු තේ සමග බන්දේසිය මේසය උඩ තනිවෙලා.අක්කා එය සාලයට අරන් ගොස් නැහැ.තේ බන්දේසිය අතට ගත්වහාම අර පපුවෙ සිරවීම නැවත දැනුණා.

අක්කාගේ තේ කලාව...

අප්පච්චිට සීනි නොදැමූ කහට තේ..අම්මාට,පුංචිට හා ආච්චම්මාට හකුරුකැට සමග තේ..නුවර බාප්පාට ගැස්ට්‍රික් නිසා සුදුකිරි...පොඩි එකාට ලාවට කහට දැමූ කිරි..ලොකු අක්කට සුපුරුදු පරිදි කෝපි...අයියාට,නැන්දලාට කිරිතේ...ඒ අතරේ මගේ නෙස්ටොමෝල්ට් ජෝගුව..මේ සියල්ල නිහඬව දුම් දමමින් තිබ්බේ අක්කා හඬනු දැක දුක වාවාගන්නට බැරුව වාගෙයි.. අක්කා ගියාට පස්සේ හැමෝගෙම රසගුණ ලෙඩදුක් මතක තියාගෙන මෙහම තේ හදන්නේ කව්ද...?????තමන් කැමති පදමට හොඳ උණු තේකක් බොන්න හමෝම කැමතියි.අක්කා ඒ සතුට හැමෝටම දුන්නා.අක්කා යන්නේ ඒ සතුටත් අරගෙනද...

හුස්ම තදින් ඉහලට අල්ලගෙන බන්දේසිය නෑදෑ පිරිස කිට්ටුවෙන් තියලා මං එතනින් පිට උණා.ආදරණීය අක්කාගේ ආදරණීය කඳුළු මුහුවෙච්ච නෙස්ටොමෝල්ට් උගුරෙන් පහලට ගියේ විශාල දැවීමක් එක්කයි.මගේ කඳුළුත් අක්කගේ කඳුළුවලට මුහු වෙන්න ඇති.ගිනියම් තේ ජෝගුව කම්මුලට තද කරගත්තත් මට රස්නයක් දනුනේ නැහැ.එතකොටයි දැක්කේ මං බලා හිඳියා වගේම අක්කා කෑම කාමරේ ජනේලෙන් මන් දිහා බලන් ඉන්නවා.මම තදින් ඇස්පියාගත්තා..ආපහු බලනකොට අක්කා ගිහින්...

ආදරණීය අක්කාට නොකී කතාව..

මගේ ආදරණීය අක්කා ලබන සතියේ විවාහ වෙනවා.මේ ලියන්නේ ඇය වෙනුවෙන්..

ඇය ආදරේ කරන්න පටන් ගත්තෙ මීට මාස කීපයකට කලින්.ඒ ඇය කිසිදා දැන හඳුනගෙන නොසිටි කෙනෙකුටයි.දීර්ඝ දුරකථන සංවාද ගනණාවකට පස්සෙ අක්කා ප්‍රේම වන්තියක් වෙලා හිටියා.අක්කා අයියාව හඳුනා ගනිමින් සිටි ඒ මුල් දිනවල මේ සංවාද රෑ දෙගොඩහරියත් පහුවෙනතුරු නැවතුනේ නැහැ.ඔහු උගත් හොඳ කෙනෙක් නිසා වැඩිහිටියන්ගේ ආශීර්වදය ඉක්මනින්ම ලැබුණා.

පවුලේ බොහෝ දේ සිදු උනේ ඇය අතින්.අනිත් සහෝදරයින්ගේ දුක සැප හොයා බැලිලි,නෑදෑ පොඩිඋන්ගේ උපන්දින, අහල පහල දාන-මාන, මගුල් තුලා, අවමගුල් උත්සව, පාසල් ආදිශිෂ්‍ය සංගම් වැඩ ආදී එකී මෙකී නොකී හැම දෙයක්ම පවුල වෙනුවෙන් නියෝජනය කලේ ඇයයි.ඉතින් ඇයගේ නික්මයාමෙන් පසුව නිවසේ විශාල අවකාශයක් ඇතිවනු නියතයි.එය පුරවන්න වෙන කිසිවෙකුත් සමත් වෙන එකක් නැහැ.

මේ ඇයගේ කුළුඳුල් ප්‍රේමය.අයියා ඇයට අලුත්ම ජංගම දුරකතනයක් තෑගි දීලා.මම ඒකට ලස්සන ringtone 1ක් දාලාදුන්නා(Richerd Marks ගේ Right here waiting for you).ඇය පුන්චි කෙල්ලක් වෙලා අයියාට හුරතල් කතා කියමින් නිවස පුරා ඇවිදින්නේ කිරිල්ලියක් වගේ.දැං ඉතින් මූණ සෝදන්න ගියත්,උයන්න ගියත්.නාන්න ගියත්,නිදාගන්න ගියත් ජංගමයා ඇය සමග.එය හැඬවෙන්නෙ කොයි මොහොතෙද ඇය සුළඟක් වගේ එතන.

අක්කා මට වඩා අවුරුදු 6කට වැඩිමල්.මම පටලැවිල්ලක් පටලවා ගත්තෙ අක්කාට කලින් නිසා මට ඇයව පේන්නේ පුංචි බෝනික්කෙක් වාගෙයි.ඇයට කියාදෙන්ට නොව කියන්නට දේ බොහොමයි.ඒත් ගෙදර පරිසරය මේදිනවල බොහොම කලබල නිසාත් මගේ
ප්‍රේම පුරාණ අවසානයක් වෙනකනුත්ගෙදර කවුරුත් දැනගත්තේ නැති නිසාත් මේවගේ වෙලාවක ඔය පලහිලව් දිගහරින එක නුවණට හුරු නැහැ.

.එනමුත් මට ඇය එක්ක නිදහසේ කතාකරන්න තිබානම් හොඳයි.නමුත් මේදිනවල ඇයව අල්ලගන්න එක හුගක් අමාරු වැඩක්.රූපලාවන්‍යාගාරය,ඇඳුම් මසන තැන,මල්සකසන තැන ආදී ස්ථාන ඇය එනකන් බලා ඉන්න නිසා ඇයට කන්න බොන්න වත් වෙලාවක් නැහැ.කොතරම් මහන්සි වෙලා ආවත් ඇය නින්දට යන්නේ ජංගමයා එක්ක හිනාවෙමින්..
ඇය පාවෙමින් දෝරේගලන ආදරයකින් තනියම හිනා වෙනවා... ඒත් මේ සියල්ල වෙනස්වන සුළුයි.ඇයට එය වටහාගන්න තව කල් යනු ඇති.එය තවකෙනෙක්ට ව්ටහාදෙන්නට පුළුවන් දෙයක් නෙමෙයි.තමන්ම වටහාගතයුතු දෙයක් .කාලය සමග හුගක් දේවල් වල වර්ණය ,තාලය වෙනස් වෙනවා.

"..ආදරණීය අක්කේ..,අක්කාගැන මට හුගාක් සතුටුයි.අක්කා සතුටින් නිසා කියන්න බැරි තරම් සතුටුයි.ඒත් අක්කේ..සුන්දර ආදරය පිටුපස නොපෙනෙන දෑ බොහෝයි.විවාහයට එලඹෙන්න තව ටිකක් කල් ගත්තානම් හොඳයි.පවුලෙන්ම මෙහෙම කියන්නේ මං විතරයි.ඒත් හඩක් නගන්නට මට බලතල නැහැ.දැන් ඒකට කල්වෙලාත් නැහැ.අක්කා බුද්ධිමත් ළමයෙක් නිසා මම හිත කරදර කරගතයුතු නැහැ.ඒත් අක්කේ මන් පසක් කරගත් එකම එක දෙයක් අක්කාට කිවයුතුයි.

ආදරය කරනවාට වඩා එය පවත්වාගැනීම අමාරුයි.."

හැමදේම හොඳින් සිදුවෙන මේ දිනවල ගෙදර හරීම ප්‍රීතිමත්.අලුත් නෑදෑයනුත් යන එන නිසා වැඩ ගොඩයි. අක්කා යන එක ගැන මතක් වෙනනකොට දුක උනත් අක්කාගේ ජීවිතය සම්පූර්ණ වෙන නිසා මට හරි සතුටුයි..!!!

සිත් අහසේ උස..

සිතක සිතිවිලි වලට ඉමක් නැහැ,නිමක් නැහැ.එක් සිතිවිල්ලක් ක්ෂණයෙන් ඇතිවී නැතිවී යනකොට සමහරක් සදාකාලයේම මතකය අත්නොහැර ඉන්නවා.තවත් සමහරක් අපි නොසිතන මොහොතක මතකයට විත් නැවත අමතක වී යනවා..

පැනනගින දහසක් සිතිවිලි අතර කියාගන්නත බැරි වුණු,අමතක කරන්නත අකමඇති,බෙදා ගන්නට තරම් රසවත් යැයි සිතෙන සිතිවිලි බොහොමයි.

ඉතින් අද සිට විවිධ වර්ණයේ විවිධ හැඩතල වල,සුන්දර, කටුක,සැහැල්ලු මෙන්ම බරසාර සිතිවිලි මේ අහසේ පාවේවි.

එන්න..මේ අහස කියවන්න.....
Related Posts with Thumbnails